KARIA'Y HA ATAU
Oĩngo peteĩ ka'aguy jovái iñypytũva, amo Kira'yty
jahasávo ko'a gotyo. Ou ndaje hína upérupi peteĩ karai peteĩ pyhare,
Kira'ytýgui. Ha oĩ peteĩ yvype ipo’iveha la tape. Guembe guasu hamba’e
henyhẽte la tape rembete guive, ha iñypytũve voi upépe. Ha oikévo la
karai upépe ndaje, ojuhu peteĩ atau puku guasu atravesádo, la tape
omboty chugui hína. Ndajeko ñasaindy porã, ha oñemo'aguĩ chugui la
karai, ohecha porãve haguã. Ojero'a nunga hi'ári ha omaña la hyepýre ha
ohecha la morotĩva pype. Oĩ la oĩva pype. Oñeno hína. Ha la kavaju ndaje
oñembo’y heseve, ndohasa mo'ãi voi mba'eveichavérõ. Ha la kavaju
okyhyjéma ramo ndaje, okyhyjéma la karai ave. Ha ojevy. Oho ótro tape
rupi, osẽ Chararã puévlope, upérupi ou haguãicha la hógape. Ha ohasapávo
la puévlo, oĩ peteĩ porton guasu. Upépe osẽvo ndaje, oguejy la henda
árigui ha ojuhu peteĩ kuñakarai karape'i oguapy la portónpe hína.
- Rejere reíko -he'i ndaje chupe la kuñakarai-. Ejevy jey, eho jey pe nde hapykuerére.
La karai nopenái la kuñakaraíre, ha ndaje oñemo'aguĩ
oheka la portónpa mba'éicha oipe'áta. Ojepovyvy ndaje ha ndojuhúi la
jaipe'aha. Ojellavea, péro ndohechái inba'evéichagua kandádo. Pytũeterei
voi upépe. Ha ndaikatu mo'ãingo la alámbre ahéno mba’e ombyai la ohasa
haguã.
- Ndikatu mo'ãi rehasa-. He’i ndaje chupe la
kuñakarai'i mimi (mokõima ndaje upérõ guarã). - Ejevy jey -. He'i chupe
hikuái.
Ha ojevy mante hapykuerére la karai. Ha oho pukumívo
ndaje, oñandu la oñeprende vevúiva ohóvo la iku’áre. Omaña ha ojuhu la
kuñarai'i peteĩva ijapýri. Upépe noñeñanduvéi la karai, ha la
kavajúntema omoguahẽ chupe heindykuéra rógape. Naimandu'ái mba’éichapa
ohasa la atau ohecha hague rupi.
Domingo Adolfo Aguilera
No hay comentarios.:
Publicar un comentario